ഭാരമില്ലയ്മയാണ് എന്‍റെ ഭാരം

(ഒരു ചെറുകഥ) 

അയാള്‍ ആലോചനയിലാണ്..

ഇന്ന് അല്ലെങ്കില്‍ നാളെ.. അതുമല്ലെങ്കില്‍ മറ്റന്നാള്‍ (അതിനപ്പുറം പറ്റില്ല) ഒരു മഹദ് സാഹിത്യകാരനായി അറിയപ്പെടാനുള്ള  ചില മാര്‍ഗ്ഗങ്ങള്‍ ആവിഷക്കരിക്കുന്നതിന്റെ അവസാന ഘട്ടം എന്ന് വേണമെങ്കില്‍ പറയാം..

ഇതുമല്ലെങ്കില്‍ പഴയ കണക്കെഴുത്ത് പണിക്കു തന്നെ പോകാം..

 പക്ഷേ സാഹിത്യത്തിന്റെ ലേബലില്‍ തന്നെ അറിയപ്പെടണം..

അതിനാണല്ലോ ഭാര്യയെ ഉപേക്ഷിച്ചതും, മക്കളെ തിരിഞ്ഞു നോക്കാത്തതും, അച്ഛനുമമ്മയും മരിച്ചപ്പോള്‍ പോലും വീട്ടില്‍ പോകാതിരുന്നതും..

തന്‍റെ എഴുത്ത് ആകെ പ്രശ്നമാണെന്ന് വായനക്കാരും നിരൂപകരും, ചില സാഹിത്യകാരന്മാരും  വിലയിരുത്തിയിരിക്കുന്നു..

ലാളിത്യം കൂടി പോയി.. കുറച്ചു കൂടെ മനുഷ്യന് മനസ്സിലാകാത്ത ഭാഷയെടുത്തു കൈകാര്യം ചെയ്‌താല്‍ നില നിലക്കാമെന്ന്..

തിരിച്ചും, മറിച്ചും, വളച്ചും, ചെരിച്ചും എഴുതിയിട്ടും കനം വരുന്നില്ല.. എന്തെഴുതിയാലും അതൊക്കെ വായിക്കുന്നവര്‍ക്ക് മനസ്സിലാകുന്നു. 

ഇവന്മാര്‍ക്ക് മനസ്സിലാകരുത്‌ എന്ന് കരുതിയാണ് കഴിഞ്ഞ കഥയില്‍ അങ്ങനെയൊരു വളച്ചൊടിക്കല്‍ നടത്തി,  ഉഗ്രന്‍ പദങ്ങള്‍ എടുത്തു പ്രയോഗിച്ചത്..

"ഉത്കൃഷ്ടമായ ബന്ധങ്ങളെ വിഷലിപ്തമാക്കി വിവാദം സൃഷ്ടിച്ചു അതില്‍ നിന്ന് ലാഭം നേടിയെടുക്കുന്ന നരാധമന്മാരെ കണ്ടെടുത്തു ഉന്മൂലനം ചെയ്യുക വഴി, മലീമസമായി കൊണ്ടിരിക്കുന്ന ഈ സമൂഹത്തിന്‍റെ മുഖച്ഛായ മാറ്റി, ഒരു സമൂഹ്യപരിവര്‍ത്തനം നടത്തുക എന്നാ ലക്ഷ്യതോടെ മുന്നേറിയ വിനയന്‍ ഒറ്റപ്പെട്ടു പോയി.. 

അന്ത്യനിമിഷങ്ങളില്‍ രേഖ വിനയനോട് ചേര്‍ന്നിരുന്നു..

ദീര്‍ഘനിശ്വാസങ്ങളുടെ അകമ്പടിയോടെ മെല്ലെ മൊഴിഞ്ഞു.. 

ജന്മം പുണ്യമാണ്.. ഇല്ലാതാകുന്ന നിമിഷത്തോടെ യാത്ര ചൊല്ലുന്ന ആത്മാവ് മറ്റൊരു ശരീരം കണ്ടെത്തി തന്‍റെ കര്‍മം 

പൂര്‍ത്തീകരിക്കുന്നു.. എന്‍റെ ശ്വാസം നിലച്ചാല്‍ വിനയന്‍ ഓര്‍ക്കണം രേഖ മറ്റൊരു ശരീരത്തിലേക്ക് പ്രവേശിച്ചു കഴിഞ്ഞെന്ന്.. അതൊരിക്കലുമൊരവസാനമല്ല...

ഒരു പ്രപഞ്ച രഹസ്യം മാത്രം.. 

നിരന്തരമായ പ്രവര്‍ത്തി കൊണ്ടേ ആശയങ്ങളെ പ്രാവര്‍ത്തികമാക്കാന്‍ സാധിക്കൂ...

നൈരന്തര്യം കണക്കാക്കാതെ വരും ജന്മത്തിന്റെ കാത്തിരിപ്പിലേക്ക് - പുതിയ മിടിപ്പിലേക്ക് കാലൂന്നുന്ന നിന്നെ സ്നേഹിച്ച പെണ്‍കുട്ടിക്ക് നീ മംഗളങ്ങള്‍ നേരണം... 

നിയോഗം.. 

നിന്‍റെ കര്‍മം മറ്റൊന്നാണ്.. അതിനായി മാത്രം നീ ചരിക്കുക.. ഓര്‍മ്മകള്‍ ശാപങ്ങള്‍ മാത്രമെന്ന സത്യം മനനം ചെയ്യുക..   "

ഏറ്റില്ല.. എന്ന് മാത്രമോ ചീറ്റി പോയി എന്ന് വേണമെങ്കില്‍ പറയാം.. ഈ കനം പോരഞ്ഞിട്ടാണോ.. സര്‍വ്വമാന എഴുത്തുകാരുടെയും കനപ്പെട്ട  പുസ്തകങ്ങള്‍ ചവച്ചിറക്കിയിട്ടും, ഫലം കാണുന്നില്ല..

എല്ലാ വിധ ചേരുവകളും ചേര്‍ത്തിട്ടും പരിഹസിക്കാനായിട്ടു  കൂടി ഒരുത്തനും എന്‍റെ പുസ്തകം തൊടുന്നില്ല..

മനുഷ്യന് മനസ്സിലായാലും മനസ്സിലാകാതെ നില്‍ക്കുന്ന ഒരെഴുത്ത് രീതി അവലംബിക്കണം..

സാധ്യമോ?

പേന അയാള്‍ നിലത്തു വച്ചു... കടലാസുകെട്ടുകള്‍ ഒതുക്കി മേശക്കരികിലെ ചുമരിനോട് ചേര്‍ത്ത് വച്ചു...

ജനങ്ങള്‍ വായിച്ചാലെ എഴുത്തുകാരന് തൃപ്തിയുള്ളൂ.. 

ആ പ്രക്രിയ ഇവിടെ പരാജയപ്പെട്ടിരിക്കുന്നു.. 

എഴുതാനായി മെനക്കെട്ട് നേരം കളഞ്ഞു താടി വളര്‍ത്തി ഇവിടെ ഇരുന്നിട്ട് വല്ല പ്രയോജനവുമുണ്ടായോ?

എഴുത്ത് മനസ്സിലേക്ക് കടന്നു വരണം.. കഥയും, കഥാപാത്രങ്ങളും സ്വയം  അവതരിക്കണം.. സൃഷ്ടി എളുപ്പമല്ല.. 

ഇപ്പോള്‍ ഇവിടെ ഇയാള്‍ വിജയിച്ചിരിക്കുന്നു.. തിരിച്ചറിവ് വിജയമല്ലേ? 

അന്വേഷിച്ചതെന്തോക്കയോ... കണ്ടെത്തിയത് മറ്റെന്തൊക്കെയോ...

തീര്‍ച്ചയായും ഒരവസരം വന്നാല്‍, ആശയങ്ങള്‍ മനസ്സില്‍ ഊറി കൂടി എന്നെ എരിപൊരി സഞ്ചാരം കൊള്ളിച്ചാല്‍...  വായനക്കാരാ, നിനക്ക് മനസ്സിലാകാത്ത ഭാഷ എനിക്ക് വഴങ്ങിയാല്‍ ഞാന്‍ തിരിച്ചു വരാം.. അയാള്‍ ആത്മഗതം ഉറക്കെ ഉരുവിട്ടു...

ഈ തിരിച്ചുപോക്ക് എനിക്ക് സമാധാനം തന്നില്ലെങ്കില്‍ ഒരു പക്ഷേ എനിക്ക് വഴങ്ങുന്ന ആ ഭാഷയുമായി ഞാന്‍ തിരിച്ചു വന്നേക്കും..

തല്ക്കാലം വിട.. അയാള്‍ ആശ്വാസത്തോടെ കിടക്കയില്‍ കയറി മലര്‍ന്നു കിടന്നു...

ഇത് മാമ്പഴക്കാലം....

ഇത് മാമ്പഴക്കാലം.... 

മാവില്‍ നിന്ന് മാവിലേക്ക്‌ പറന്നിറങ്ങി കാക്കകള്‍ മാമ്പഴം കൊത്തി തിന്നുന്നു... 

പാറി പറന്നിറങ്ങുന്ന കൊമ്പിലെ കരിയിലകള്‍ കാക്ക കാലുകള്‍ക്കിടയില്‍ അമര്‍ന്നു പൊടിഞ്ഞു തീരുന്നു..  കുഞ്ഞുപക്ഷികളും, ഉറുമ്പിന്‍ പറ്റങ്ങളും, സര്‍വ്വ ചെറുജീവികളും ഓടിയൊളിക്കുന്നു.. 

 കാക്കകള്‍ പറന്നിറങ്ങുന്നത് മാമ്പഴം തിന്നാനോ അതോ ചെറുജീവികളെ ചവിട്ടി മെതിക്കാനോ ?

കാക്കകള്‍ക്ക് മാമ്പഴം ഇത്ര ഇഷ്ടമോ? 

എന്ന് തീരും ഈ മാമ്പഴക്കാലം?  

നട്ടെല്ല്

നട്ടെല്ല് എന്ത് കൊണ്ടാണ് ഇത്രയും പ്രാമുഖ്യമുള്ള എല്ലായി മാറിയത്?
ആണത്തമില്ലാത്ത പുരുഷന്മാരെ നട്ടെല്ല് ഇല്ലാത്തവര്‍ എന്ന് വിളിക്കുന്നു... 

എന്ത് കൊണ്ട്? എന്ത് കൊണ്ട്? 

നിവര്‍ന്നു നില്‍ക്കാന്‍ നട്ടെല്ല് വേണം.. അല്ലെ? 

നിവര്‍ന്നു നില്ക്കാന്‍ കെല്‍പ്പില്ലാതെ  അവസരത്തിലും, അനവസരത്തിലും   നടു വളച്ചൊടിച്ചു ചുരുങ്ങി കൂടി നില്‍ക്കുന്ന പുരുഷന്മാര്‍ നട്ടെല്ല് ഇല്ലാത്തവര്‍ തന്നെ.. അങ്ങനെ തന്നെയല്ലേ പറയേണ്ടത്?

അപ്പൊ സ്ത്രീയോ? അവള്‍ക്കും നട്ടെല്ല് പ്രധാനമല്ലേ? അതോ അവള്‍ അതു വളച്ചൊടിച്ചു നിന്നാലേ നല്ലവള്‍ എന്ന പേര് കിട്ടൂ? 

സ്ത്രീ ഭയന്ന്, ഒതുങ്ങി, അഭിപ്രായങ്ങളില്ലാത്തവള്‍ ആയി നില കൊണ്ടാലേ ബഹുമാനം കിട്ടൂ എന്ന സ്ഥിതി ഏറെ കുറെ മാറിയിരിക്കുന്നു.. ഇല്ലേ.. അങ്ങനെയല്ലേ? 

എന്നാലിന്നും, അങ്ങിനെ പമ്മിയിരിക്കുന്ന പൂച്ചക്കുട്ടികള്‍ ആണ് പാവങ്ങള്‍ എന്നൊരു പറച്ചിലുണ്ട്..

(അതായത് നട്ടെല്ല് യഥേഷ്ടം വളച്ചു പിടിക്കാവുന്ന സ്ത്രീകള്‍)

 അവരെ വളരെ സ്നേഹത്തോടെ കൊഞ്ചിക്കുന്ന പലരെയും കണ്ടിട്ടുണ്ട്.. സത്യത്തില്‍ മിണ്ടാതിരിക്കലും, പാവമഭിനയിക്കലും മാറ്റി നിറുത്തിയാല്‍ നട്ടെല്ലുള്ള സ്ത്രീകള്‍ അഭിപ്രായം പറയാന്‍ ധൈര്യം ഉള്ളവരായിരിക്കും.. 

നട്ടെല്ല് എന്ന ഈ എല്ല് സ്ത്രീക്കായാലും, പുരുഷനായാലും വളരെ പ്രാധാന്യമുള്ളത് തന്നെ.. 

പറയാനുള്ളത് പറയാനും, ചെയ്യാനുള്ളത് ചെയ്യാനും നട്ടെല്ല് വളക്കാതെ സത്യങ്ങള്‍ പറയാനും കഴിവുള്ളവരെ തന്നെയേ അംഗീകരിക്കേണ്ട കാര്യമുള്ളൂ. 

പക്ഷെ ഞാന്‍ ചിന്തിച്ചു..എന്‍റെ നട്ടെല്ല് ഞാന്‍ ഇപ്പോഴും നിവര്‍ത്തിയാണോ പിടിക്കുന്നത്‌?

അല്ല.... പേടിച്ചും, പലരെയും വെറുപ്പിക്കേണ്ട എന്ന് കരുതിയും ഞാനും അധിക സമയവും എന്‍റെ നട്ടെല്ലിനെ ചുരുട്ടി, പാമ്പ്, പാമ്പാട്ടിയുടെ കൂടയില്‍ കിടക്കും പോലെ ആണ് വച്ചിരിക്കുന്നത്.. 

പിന്നെ എനിക്ക് ഈ പ്രസംഗമെഴുതാന്‍ എന്ത് യോഗ്യത? എന്നാലും ഈ ബ്ലോഗിങ്ങ് തുടങ്ങിയതില്‍ പിന്നെ എനിക്കെന്‍റെ നട്ടെല്ല് നിവര്‍ത്തി പിടിക്കാന്‍ അവസരം കിട്ടുന്നുണ്ട്‌ എന്നൊരു സന്തോഷമുണ്ട്.. 

(നേരിട്ട് പറയാന്‍ കഴിയാത്ത കാര്യങ്ങല്ലേ എഴുതപ്പെടുന്നത്‌? അപ്പോള്‍ ഇതും ഒരു ഒളിച്ചോട്ടമോ, ഒളിച്ചുകളിയോ  ഒക്കെയല്ലേ?  )

എവിടെ പോയി മുല്ലപെരിയാരും, ചേട്ടന്മാരും?

നിങ്ങള്‍ക്ക് സാമൂഹ്യബോധമുണ്ടോ?

സഹജീവികളോട് സഹാനുഭൂതിയുണ്ടോ? 

നിങ്ങളെ പോലെ തന്നെ ജീവിക്കാന്‍ അര്‍ഹതയുള്ളവരെ കുറിച്ച് നിങ്ങള്‍ ഇത് വരെ ചിന്തിച്ചിട്ടുണ്ടോ?

മുല്ലപ്പെരിയാര്‍ അണകെട്ട് ഇന്നോ നാളെയോ പൊട്ടി തെറിക്കും.. 

നിങ്ങള്‍ ഇവിടെ ഇങ്ങനെ അനങ്ങാ പാറ  പോലിരിക്കുന്നത്‌ മനസ്സാക്ഷിയുടെ കുറവ് കൊണ്ട് മാത്രമല്ലെ.,... 

ഇതൊന്നും എന്‍റെ വാക്കുകളല്ല.. ഒരാറു മാസം മുന്‍പ് ഇവിടെ പല വേദികളിലും പല  മഹാന്മാരും ഉദ്ഘോഷിച്ച മൊഴിമുത്തുകള്‍ ആണ്. ഇപ്പോള്‍ അവര്‍ തിരക്കിലാണ്..  ഏതൊരു സാധാരണ മാധ്യമത്തെ പോലെയും തരം

 താണിരിക്കുന്നു.. പുതിയ വാര്‍ത്തകളില്‍ പഴയ വാര്‍ത്തകള്‍ മുങ്ങി പോയിരിക്കുന്നു...
അടുത്ത വാര്‍ത്ത അന്വേഷിച്ചു മുല്ലപെരിയാരിനെയും മറന്നു മുന്നേറിയിരിക്കുന്നു..   (അപ്പൊ ഇത്രെയേ ഉണ്ടായിരുന്നുള്ളൂ ആ അണകെട്ടിന്റെ പ്രാധാന്യം?) 

എന്‍റെ അറിവ് ശരിയാണെങ്കില്‍ മുല്ലപെരിയാര്‍ പൊട്ടി തെറിച്ചിട്ടില്ല ഇത് വരെ.. 

ഇപ്പോഴും അതിന്‍റെ പരിസര പ്രദേശങ്ങളില്‍ ജീവിച്ചവര്‍ അവിടെ തന്നെയുണ്ട്‌.. (അതോ ഈ മഹാന്മാര്‍ കൂട്ടം ചേര്‍ന്ന് പോയി അവരെ പുനരധിവസിപ്പിച്ചോ?)

ആ ആവേശം കണ്ടപ്പോള്‍ ഞാനന്ന് തെറ്റിദ്ധരിച്ചു പോയി.. ഇവരൊക്കെ കൂടി എന്തൊക്കെയോ ചെയ്യാന്‍ പോകുന്നു എന്ന്.. 

ഇല്ലന്നെ.. എല്ലാം വെറും നാടകങ്ങള്‍..

 (ഒരു പക്ഷെ നിങ്ങള്‍ പറയുമായിരിക്കും, അവര്‍ എന്നല്ല ആര് കൂട്ടിയാലും ഒന്നും നടക്കില്ല.. അതു വ്യവസ്ഥിതിയുടെ തകരാറാണ്.. അതിനു ഒരു കൂട്ടത്തെ പഴിച്ചു അവരെ നിരുത്സാഹപ്പെടുത്തരുത്‌ എന്നൊക്കെ.. )

ഇറ്റലിയും, സോണിയ ഗാന്ധിയും, മന്‍മോഹന്‍ സിങ്ങും, മുസ്ലിം ലീഗും എല്ലാം കൂടി നല്ല വിരുന്നൊരുക്കിയിരിക്കുന്നു... അപ്പോള്‍ നമ്മുടെ വികാരം കൊണ്ട സര്‍വ്വ ചേട്ടന്മാരും മദാമ്മയുടെയും, വെള്ള പട്ടാളത്തിന്റെയും വിശേഷം അറിയാന്‍ ഓടിയിരിക്കുന്നു.. പിന്നെ മുല്ലപെരിയാര്‍ നോക്കാനും അവര്‍ക്ക് വേണ്ടി എഴുതി കൂട്ടാനും എവിടെ സമയം അല്ലെ.. 

പുതിയ വിഷയങ്ങളെ തൃണവല്‍ഗണിക്കൂ എന്നല്ല എന്‍റെ ആഹ്വാനം..

 പക്ഷെ കാട്ടി കൂട്ടിയ ആവേശത്തിന്റെ അളവല്‍പ്പം കുറയ്ക്കാമായിരുന്നു ചേട്ടന്മാര്‍ക്ക്... 

ഇത്തരം കൊപ്രയങ്ങള്‍ക്ക് കൂട്ട് നിലക്കത്തവരെ പഴിക്കാതിരിക്കാമായിരുന്നു, ഇത് പോലൊരു മറവി ഇവര്‍ക്ക് സാധ്യമാകുമായിരുന്നെങ്കില്‍.. 

കൊല

നിങ്ങള്‍ക്ക് ഒരാളെ കൊല്ലണം എന്നുണ്ടെങ്കില്‍ രണ്ടു മാര്‍ഗ്ഗമുണ്ട്.. 

• ഒന്ന് നേരിട്ട് പോയി അയാളെ അങ്ങ് ശരിപ്പെടുത്താം.. 
• അല്ലെങ്കില്‍ വാടക കൊലയാളിയെ ഏര്‍പ്പെടുത്താം.. 

രണ്ടായാലും കൊല, കൊല തന്നെ... അതോ അങ്ങനെയല്ലേ? 

വടക്കന്‍ പാട്ട്

പാണന്‍ പാട്ടുകളുടെ ഈരടികള്‍ ഉയര്‍ന്നു കേള്‍ക്കുന്നു.. ഞാന്‍ കടത്തനാട്ടിലോ, കോലത്തുനാട്ടിലോ, വയനാട്ടിലോ ആണോ ജീവിക്കുന്നത്? ഇവിടെയുമുണ്ടോ ഒതേനനും, ആരോമലും, പാലാട്ടു കോമനും, പയ്യമ്പിള്ളി ചന്തുവും? 

പാണന്മാര്‍ ഉടുക്കും കൊട്ടി ചരിക്കുമ്പോള്‍ കാലം പിന്‍ തിരിഞ്ഞോടിയ പോലുണ്ട്.. 

എന്താണ് കമ്മ്യൂണിസം?

എന്താണ് കമ്മ്യൂണിസം? 

ഫേസ് ബുക്കില്‍ നാട്ടിലെ രാഷ്ട്രീയത്തെ വിമര്‍ശിക്കുന്ന   കുറെ പേര്‍   അന്യനാട്ടില്‍ ബൂര്‍ഷകള്‍ ആയല്ലേ വിലസുന്നത്.. ബൂര്‍ഷകള്‍ക്ക് വേണ്ടി സംസാരിച്ചു, ഞങ്ങള്‍ കമ്മ്യൂണിസ്റ്റ്‌കാര്‍ എന്ന് പ്രസംഗിക്കുന്നതിനെക്കാള്‍ ഭേദം മിണ്ടാതിരിക്കുന്നതല്ലേ..  രാവിലെ എഴുന്നേറ്റു വായില്‍ കൊള്ളാത്ത വലിയ കാര്യങ്ങള്‍ ഒക്കെ സ്റ്റാറ്റസ് ആയി ചര്‍ദ്ദിച്ചു ഞങ്ങള്‍ എന്തോ വലിയ കാര്യം ചെയ്തു, പറഞ്ഞു എന്ന മട്ടില്‍ ഇരിക്കുന്ന ഇത്തരം പീക്കിരികളെ കാണുമ്പോള്‍ ഞാന്‍ തിരിഞ്ഞു നിന്ന് കൊഞ്ഞനം കുത്തും.. 

എനിക്ക് രാഷ്ട്രീയമറിയില്ല..ഞാന്‍ കമ്മ്യൂണിസ്റ്റ്‌കാരിയല്ല.. കോണ്‍ഗ്രസ്‌ അനുഭവിയുമല്ല.. ബി.ജെ.പിയുമല്ല... 

 പക്ഷെ ഇങ്ങനെ ഓരോന്ന് ചെയ്യുന്നവരെ കാണുമ്പോള്‍ വെറുതെ പ്രതികരിക്കാന്‍ തോന്നുന്നു... 

കമ്മ്യൂണിസം പറയാതെ ജീവിക്കാന്‍ നോക്ക് മക്കളെ എന്ന് പറയാന്‍ തോന്നുന്നു.. 

അന്യനാട്ടില്‍ വമ്പന്മാരെ താങ്ങി അവര്‍ക്ക് വേണ്ടി സംസാരിക്കുന്നവര്‍ നാട്ടിലെ കാര്യം വരുമ്പോള്‍ എന്തിനു കോണ്‍ഗ്രെസ്സ്കാരെ കുത്തുന്നു? പിന്നെയും പറയാം എനിക്ക് രാഷ്ട്രീയമില്ല... രാഷ്ട്രീയാവബോധവുമില്ല.. പക്ഷെ പ്രതികരണശേഷി നഷ്ടമാകാത്തത് കൊണ്ടാവും ഇത്തരക്കാരെ കാണുമ്പോള്‍ നിറുത്തി പോ മോനെ എന്ന് പറയാന്‍ തോന്നുന്നത്.. 

നമ്മുടെ  സ്ഥാനം ഉറപ്പാക്കി  നമുക്ക് ഇഷ്ടാനുസരണം വിഹരിക്കാന്‍ ആരെയും അനുകൂലിക്കാമെന്ന്... അതല്ലേ ഇക്കൂട്ടര്‍ ചെയ്യുന്നത്.. ഇവരാണോ കമ്മ്യൂണിസ്റ്റ്‌ അനുഭാവികള്‍.. ലജ്ജാവഹം... 

എനിക്കിവരെ കാണുമ്പോള്‍ ഉറക്കെ വിളിച്ചു പറയാന്‍ തോന്നും.. പക്ഷെ എന്ത് കാര്യം.. 

ആരും ആരെക്കാളും മെച്ചക്കാരല്ല എന്നോര്‍മ്മിപ്പിക്കാന്‍ തോന്നും.. പക്ഷെ ഫലമില്ലാതൊരു കാര്യം ഞാന്‍ ചെയ്യണോ?

ഇല്ല അവരെയൊന്നും തിരുത്താന്‍ എനിക്കുദ്ദേശമില്ല..